​
Somos un grupu de muyeres asturianes xuníes col propósitu d'esponer, aguantar ya intentar superar los problemes rellacionaos cola muyer y, poro, a tola sociedá por cuenta de la opresión que topamos.
El feminismu gueta’l raigañu d'esta opresión, nun se concibe un movimientu políticu que nun analice y darréu encamine la so actuación escontra les bases-raigaños de la opresión contra la que llucha. Camentamos qu'esta opresión anicia anguaño en dos realidaes distintes, pero en perfeuta simbiosis: el patriarcáu ya’l capitalismu, siendo esta la razón que nos da'l nomatu de “radical”.
Esta opresión escontra la muyer na sociedá manifestó distintes realidaes a lo llargo la hestoria, amosando'l patriarcáu la so capacidá d'adaptación y supervivencia a distintos sistemes políticos, económicos y culturales: tuvo presente n’ Antigüedá, demientres el feudalismu, tornó exitosamente y por un tiempu'l llume de la Razón mientres la Ilustración y, caberamente, aportó hasta los nuesos díes. So l'alianza de patriarcáu y capital, la muyer non solo se ve amenorgada, como enantes, a cumplir colos mandatos de la feminidá impuesta (esposa, madre, suxetu pasivu, discretu, sumisu, eróticu y guapu, sinón qu'amás camúdase n'oxetu de consumu sexual, estéticu, emocional y reproductivu.
Poro, ye necesariu caltener fuerte al suxetu políticu del feminismu, les muyeres, para poner en xaque'l statu quo y denunciar la nuesa situación nel mundu. Atalantamos que pa esto, tenemos de disponer d'un espaciu onde aldericar, conocer a otres muyeres y espublizar el feminismu a tolos niveles, col oxetivu de construyir una sociedá igualitaria. Nesti sentíu, los nuesos trés exes d'actuación carauterísticos, ensin dexar de llau tolos demás aspeutos qu'esmolecen al movimientu feminista nel so conxuntu, son:
1. La llucha contra la esplotación reproductiva de les muyeres, delitu qu'atenta los sos drechos humanos y los de los sos naciellos. Esta práutica de mercantilización recai sobro les muyeres más vulnerables, comprometiendo la so salú física, psíquica y social.
​​
2. L'abolición de la prostitución, una de les formes más antigües de violencia escontra les muyeres y neñes. Tenemos de lluchar non solo contra la trata, sinón tamién contra la prostitución, dos realidaes indisolubles, puxando por un modelu abolicionista qu'ampare y protexa a les prostitutes, y sancione y castigue a puteros y proxenetes. Asina como denunciar la pornografía comu bas d'un ideariu de dominación masculina que nos fai de menos y nos cosifica.
​​
3. L'abolición del xéneru. El sexu ye la carauterística biolóxica que nos define como femes, fechu pol cual nos vemos oprimíes. En bas al nuesu sexu constrúyese cultural ya hestóricamente el xéneru: la ferramienta d’opresión. Guetamos frayar la opresión finando col xéneru, pa salir de la subordinación y recuperar los nuesos espacios como metá de la población na sociedá.
Tamos equí non solo pa siguir lluchando, sinón tamién pa recordar ente toes los innumberables llogros feministes colos que convivimos a diariu, que son la manifestación de que'l progresu non solo ye posible -dende la política-, sinón que ye un fechu – dende l'enfoque hestóricu- y un mandatu -dende la ética-.
Si te sientes identificada cola nuesa llucha:¡xúnite!
​
Como dixo Carol Hanisch: ‘Lo personal ye político’.
​